“Nichts ist heilig”

Sou ass e Leitartikel iwwerschriwwen, deen haut (14.01.2015) op Tageblatt online verëffentlecht ginn ass. Wéi sou dacks an deene läschten Deeg muss Pegida an d`Terroraktioune vu Paräis duerhalen, fir eng skuril Siicht vun der Fräiheet breet ze trëppelen.

Dem Här F. Wagner, aus deem senger Fieder dësen Artikel staamt, genéiert sech nët fir sengen iwwerhieflechen Aussoen duerch d`Uwende vum “Pluralis Majestatis” als absolut hinzestellen . Sou betount hien: “... wir können Ihnen hier kurz und präzise erklären, was heilig ist: nämlich NICHTS! Nichts ist heilig. Nichts ist tabu. Und ALLES darf karikiert werden.” Dat erkläert hien dem Imam vu Mamer, deen ët gewot huet, eng aner Meenung iwwert dee Sujet ze hunn a proposéiert huet mat de Vertrieder aus anere Reliounen doriwwer ze schwätzen.

Fir d`éischt zum Thema Karikatur. Eng Karikatur stellt Persounen oder Situatioune bewosst iwwerspëtzt duer; si ka lächerlech maachen oder ukloen. Ech hu keng Definitioun fonnt, déi erlaabt, datt eng Karikatur ka beleidegen. Bis elo huet een ët nët néideg gehat duerch iergend eng Zensurmoossnam  ze reglementéieren. Leit mat Manéieren hunn hir Matbierger mat Respekt behandelt – och wa si se op Mängel a Feeler higewisen hunn.

Wann een als neutrale Nokuckert d`Reaktioune vu ville Politiker an dem gréissten Deel vun der Press iwwer Pegida registréiert, da kann een nët iwwersinn, datt “Respekt” zu engem Friemwuert mutéiert ass. Vun “Unanständige” bis “Scheissnazi” wor alles drënner, nët ze vergiessen déi intelligent Ausdréck vum Schreiwer vun dem Tageblatt-Leitartikel: “Brunzköpfe ... Kretins ... Bornierte”. Wéi bornéiert muss ee sinn, fir sech esou iwwert d`Meenung vun anere Leit z`erhiewen, grad dann wann een nët hierer Meenung ass! Wann d`Recht op eng aner Meenung nët respektéiert gëtt (dat huet näischt domat ze dinn, dat ee mat där Meenung averstan ass!), mee wann dat Recht mat Nidderjäitzen, Verleumden a Lächerlechmaachen bekämpft gëtt, dann ass dat en Zeeche vun deem schlechte Gesondheetszoustand vun der Gesellschaft.

Dann zur Ausso “NICHTS ... ist heilig”, absolut näischt; duerop pocht den F. Wagner. Duerfir schreift hien ët a grousse Buschtawen. Onofhängeg dovun, datt fir gleeweg Leit hire Gott helleg ass, gëtt et fir all Mënsch Persounen, déi fir hien helleg sinn. Wann den Här Wagner dat nët versteet, da soll hie sech emol virstelle, wat seng Reaktioun wier, wann ech déi Mënschen, déi hie gären huet, ganz onhelleg duerch Beleidegung op d`Schëpp géing huelen. Wann hien domat kee Problem huet, dann huet e wierklech e Problem!

“Die Würde des Menschen ist unantastbar.” Dësen einfachen an awer bedeitungsvolle Saz steet am Däitsche Grondgesetz. Ët bedeit nët manner, wéi datt all Diskriminéierung, Beleidegung, Erofmaachen a Meenungsënnerdréckung z`ënnerloossen ass. Vläicht mécht den Här Wagner sech emol doriwwer Gedanken, éiert hien déi nächste Kéier de Griffel an de Grapp hëlt.

Moralesche Niddergang (2)

2.  Famill a Bestiednes

Nodeem déi éischt Schwulen- an déi éischt Lesbe-Koppel bestued sinn an eis Regierungsparteien eent vun hiren Haaptziler konkretiséiere konnten, ass ët Zäit, sech iwwert gesellschaftlech Ännerung Gedanken ze maachen. Ech hu meng Bedenken, wat d`Folge vun dem Homobestiednes ubelaangt. Aus menger Siicht gesinn ech 3 méi oder wéineger grouss Problemer op eis duerkommen.

a.       D`Bewäertung vun der traditioneller Famill, d.h. baséiert op dem Bestiednes vun engem Mann mat enger Fra. A praktesch alle Kulturen steet dës Konfiguratioun am Mëttelpunkt vun der Gesellschaft – verschiddentlech mat der Variatioun vun e pur Frae mat engem Mann oder, méi seelen, vun e pur Männer mat enger Fra. Si ass d`Gronbedingung fir de Fortbëstand  oder d`Weiderentwécklung vun der Gesellschaft. D`Weiderexistenz vun der mënschlecher Rass ass nure garantéiert duerch d`Vereenegung vun engem Mann mat enger Fra, onofhängeg vun alle postmoderne, genderistesche Phantasien. Eng opgeschlosse Familljepolitik muss déi traditionell Famill ganz uewen op hirem Aktiounsplang stoen hunn. Dat huet näischt mat Konservatismus an Hinterwäldertum ze dinn, mee ass ganz kloer zukunftsorientéiert. Eng Familljeministesch, déi deklaréiert, “keng natalistesch Politik” bedreiwen ze wëllen, ass a mengen Ae kloer op der falscher Plaz.

Der traditioneller Konstellatioun 1Mann-1 Fra gehéiert an der Familljepolitik ganz eendeiteg di éischt Prioritéit! Si steet als eenzegaarteg do, well si als eenzeg vu sech aus reproduzéierbar ass. Wann aner Partnerschaften legaliséiert solle ginn, da soll dat méiglech sinn, wann d`Vollek dat esou wëllt an ët moralesch vertrietbar ass. Déi exklusiv Positioun vun der traditioneller Famill muss awer ëmmer eng exklusiv bleiwen a vun der Gesellschaft prioritär (!) ënnerstëtzt ginn. 

b.      D`Legaliséierung vun dem Homobestiednes huet dëser Aart vu Partnerschaft Virdeeler bruecht – an domat aner Aarte vu Partnerschaft diskriminéiert.  Vill Mënschen liewen an enger Partnerschaft zesummen, gläichgeschlechtlech oder och nët. Si deelen d`Wunneng an d`Flichten am Haus, verbréngen hir Zäit zesummen a sinn ee fir deen aneren do, a gudde wéi a manner gudde Stonnen. Just d`Bett deelen se nët. Sollte si nët och déi nämlech Rechter hunn wéi déi, déi sech als Homo “outen”?

Oder wéi ass ët mat dem Wittmann an der Wittfra, déi sech fonnt hunn a sech gären hunn. Ass ët wierklech an der Rei, wa si a “wilder Ehe” zesumme liewe mussen, fir nët nach méi benodeelegt ze ginn duerch de Verloscht vun Deeler vun hirer Rent. Wier ët nët ubruecht, grad hinnen – an ët gëtt der ëmmer méi – d`Méiglechkeet unzebidden, sech ze bestueden ouni datt dat hinnen e finanzielle Nodeel bréngt. 

c.       D`Homobestiednes ass eng éischt Etapp um Wee zu weideren onorthodoxe Forme vum Zesummeliewen. D`Partnerschaft zu 3 a méi Persounen ass nët méi wäit. Neen, d`Phantasie geet nët mat mer doduerch, mee ech kucke, wat esou an der sougenannter ziviliséierter Welt geschitt a kommen aus dem Staune nët méi eraus. An England huet en Trio vun dräi Frae sech d`Recht geriichtlech erkämpft, sech mateneen ze bestueden. Ob d`Queen doriwwer “amused” wor ass nët aus de Noriichten ervirgaangen – ech wor ët op jidder Fall nët. Wéini déi nächst “Multi-Partnerschaft” (hei kann ee jo nët méi vun enger Koppel schwätzen) ofgeseent gëtt ass nure nach eng Fro vun der Zäit. Vläicht sinn ët dann 3 Männer oder 2 Männer mat enger Fra oder 2 Frae mat engem Mann, oder firwat net 4 Persounen a 5 verschiddene Variatiounen. D`Polygamie steet virun der Dier a mär wäerten se era loossen.

An Däitschland huet den nationalen Ethik-Rot zu enger weiderer Etapp opgeruff. Hien huet den Autoritéite geroden, enger Koppel vu Brudder a Schwëster d`Bestiednes  ze erlaben ... obwuel déi zwee schonn zwee Kanner zesummen hunn – allen zwee geeschteg behënnert.  

Ech kann do nure nach soen: eis Zivilisatioun ass am gaang dat Graf auszeschëppen, an där se selwer wäert begruewe ginn!

Unerkennung vu Palästina.

Eng vun de läschten Aktiounen vun eiser Chamber am vergaangene Joer wor ët, de Wee fir eis Regierung fräizemaachen, Palästina als e Staat unzeerkennen. Als Bedingung wor, dës Unerkennung ze deklaréieren, wann dee richtege Moment komm wier fir dës Aktioun. Wann een den Äifer gesäit, mat deem eisen Ausseminister sech hannert d`Palästineser stellt, dann dierf een der Usiicht sinn, datt hie geschwënn wäert de “richtege Moment” erkannt hunn.

Ech fannen ët ower paradox, wa sech do beméit gëtt, Palästina als Land unzeerkennen, wou bis haut weder d`Hamas nach d`Fatah bereet ass, Israel hirersäits als Staat unzeerkennen. Dobäi wor Lëtzebuerg een vun deenen 33 Staten vu 56, déi den 29. November 1947 dem UN-Deelungsplang zougestëmmt hunn, deen ët erlaabt huet, datt de 14. Mee 1984, nom Enn vum britesche Mandat, Israel seng Souveränitéit ausgeruff huet. Nach deen nämmlechten Dag hunn d`”Palästinenser” mat hiren arabesche Frënn déi jonk Natioun ugegraff, mam Zil  Israel ze zerstéieren an d`Judden an d`Mir ze dreiwen. (Ech hu “Palästinenser” a Gänseféissercher gesat, well ët deemools dat “palästinensescht Vollek” nach nët gouf! Dee Begrëff gouf eréischt 1964 erfonnt.) Dat ass, wéi mer all wëssen, nët gelongen.

Mee dat Zil ass ower ni aus den Ae verluer gaang  an d`Hamas huet d’Zerstéierung vun alle Judden nach haut an hirer Grondsaatzerklärung stoen. De facto also wëlle mer eng Bevëlkerungsgrupp als Staat unerkennen, déi als éischt Zil huet, den Nopeschstaat ze zerstéieren. Do muss emol ee mer erklären, wat dat zur “Friedensfindung” ka bäidroen.

Ech wëll an deem Zesummenhang op en Artikel hiweisen, deen aus der Fieder vun engem palästinensesche Geléierte staamt. Vläicht kann dëse realistesche Mann  muncherengem zu enger iwwerraschender “Wahrheitsfindung” verhëllefen.

http://www.gatestoneinstitute.org/4991/palestinians-enemy-europe

Eng aner Siicht

Dësen Artikel wëll ech Iech nët virenthalen. Aus där Siicht kréie mer ët an eise Medien nët gewisen.

http://tinyurl.com/ne5bbu8

Eng grouss Erausfuerderung fir d`Land

Lëtzebuerg steet den Ament ganz staark am Fokus vun der internationaler Press. Geschëlt ass dësen Ëmstand der Aart a Weis wéi Lëtzebuerg mat groussen internationale finanzkräftege Firmen ëmgeet wat d`Steieren ubelaangt. Vun eise Politiker, egal wéi se politesch agestallt sinn, kréie mer verséchert, datt alles am Respekt vu nationalen an internationale Gesetzer erfollegt ass. Ët ass ze hoffen, datt dat wierklech de Fall ass, soss kéint ët eis alleguer un de Portmonni goen.

Datt mir als Lëtzebuerger zum Land sollen halen, dat fannen ech an der Rei. Dat gëllt fir gutt ewéi fir schlecht Zäiten. Mat gemëschte Gefiller verfollegen ech allerdéngs dee Spagat, dee vu munche Politiker vollzu gëtt, wann ët dorëms geet, déi dubios Finanzgeschäfter ze rechtfertegen. Do gëtt vun “Tricker” geschwat, wéi wann eis Politiker nët gewousst hätten, ëm wat fir Tricker ët sech géing handelen, hu si dach grad duerch lëtzebuergesch Gesetzer a Reglementer dës onduerchsiichteg Firmegeflechter erméiglecht. An dat Argument, datt och esou Saachen an aner Länner geschéien hëlleft eis elo guer nët weider.

Ët geet mer éischter ëm dee moraleschen Aspekt. Den Apostel Paulus schreift a sengem éischte Bréif un d`Korinther: “Alles ass erlaabt, ower nët alles déngt deem Gudden. Alles ass erlaabt, ower nët alles baut op.” Wa mer (Lëtzebuerg) nët géint e Gesetz verstouss hunn, ka keen eis hei veruerteelen. An dach hu mer eis a villen Hisiichte schëlleg gemeet.

-        Wéivill Milliarden sinn anere Länner verluer gaang, well mir mat individuell ausgehandelte Steiersätz Firmen heihinner gelackelt hunn. Mer reegen eis sécherlech zu Recht op, wa mer vum 1. Januar un an Däitschland Stroossentaxe musse bezuelen, fannen ët ower gläichzäiteg an der Rei, wa mer dem däitsche Fiskus Steiermilliarde virun der Nues ewech gebotzt hunn.

 

-        Mer bekloen eis, datt d`Schéier tëschent Aarm a Räich ëmmer méi grouss gëtt, erlaben ët ower op der anerer Säit, datt d`Groussaktionäre vu grousse Multien sech un onverdingten Dividenden nach méi beräicheren.

-        Mer weisen eis iwweraus grousshäerzeg géintiwwer Firmen, déi Millioune Gewënner verbuchen, sinn ower onbaarmhäerzeg géintiwwer lëtzebuerger Familljen a Firmen. Déi kréie keng “Tricken” ugebuede fir der Steierlaascht z`entgoen.

 E Beispill zum läschte Punkt gefälleg? Déi däitsch Firma “e.on” huet iwwer hier Duechterfirma “Dutchdelta” 130 Milliounen € Gewënn duerch Zënsakommes gemeet. Op déi 130 Milliounen hu se grad emol 1575 € Steiere bezuelt. Dat entsprécht engem Steiersaatz vun 0,0012%! Ët ass mer e Veräin bekannt, deen am Joer 2013 Recetten an Héicht vun 18.000 € hat. Dës Recette woren ausschliisslech Spenden, déi integral (!) benotzt goufe fir e Kannerheem an Indonesien z`ënnerstëtzen. E Gewënn ass nët gemeet ginn. Zum Schluss vum Joer woren 145 € an der Keess. De Fiskus verlaangt dovunner 3000 € Steieren. E Veräin, deen op bénévoler  Basis Tsunamiaffer ënnerstëtzt bezilt duebel esou vill Steier wéi de Grousskonzern “e.on”. Steiergerechtegkeet gesäit sécherlech anescht aus!

Vläicht maachen eis Politiker sech emol eeschtlech Gedanken iwwer moralesch Wäerter, déi se solle vertrieden. Ech invitéiren all déi Verantwortlech a Chamber a Gouvernement, dat wat elo geschitt ass och als eng Chance ze gesinn, nämlech d`Méiglechkeet vun engem neien Ufank – engem propperen. Iwwersiichtlech Steiergesetzer, ausgewien a gerecht Taxen an Transfertleeschtungen. Ech wor laang Jore stolz op mäi Land, wou Mënschen duerch hiren Know How, duerch Asaz a Fläiss  hir Kuuscht éierlech verdéngt hunn an all zesummen um Opbau vum Land matgedroen hunn. Haut schummen ech mech am Ausland ze soen, ech wier Lëtzebuerger.

Moralesche Niddergang

(1. Deel)


Ech weess, datt nët jidderengem dat wäert groussaarteg gefalen, wat en elo hei liest. Mee op d`Gefor hinn, datt déi, déi fir hir Astellung vun all Mënsch Toleranz ouni Grenzen afuerderen, mech ouni déi geréngste Spur vun Toleranz hirersäits elo verbal fäerdeg wëlle maachen, hei dann elo trotzdem meng Usiicht.

1. Zur Ofdreiwung

Eist Ofdreiwungsgesetz gëtt alt erëm eng Kéier verwässert, oder – fir ët politesch korrekt auszedrécken – liberaliséiert. Wéi esou dacks kréie mer da gesot, ët misst der Realitéit ugepasst ginn. Ech sinn, nët nure wat dësen Thema ugeet, der naiver Meenung, datt d`Réalitéit sech nom Gesetz ze riichten huet, an nët ëmgekéiert. Mee dat sief emol elo op der Säit gelooss fir dee Problem do ze diskutéieren. En Opmaacher am Stern huet am Joer 1971 der Diskussioun zur Ofdreiwung e neie Schwonk ginn: “Ich habe abgetrieben.” Sou hunn an der däitscher Boulevards-Illustréierter 374 Fraen “zouginn” an domat bekannt, datt si géint dat bestehend Gesetz verstouss hunn. (Spéider koum eraus (http://tinyurl.com/mx4mwph) datt e groussen Deel vun dëse Fraen nët ofgedriwwen hat, mee sech dozou bewege gelooss huet, sécherlech encouragéiert duerch eng entspriechend Finanzsprëtz, ze behaapten, eng Ofdreiwung gemaach ze hunn.) Hiert Haaptargument wor: “Mein Bauch gehört mir!” Vläicht wier dat mat der Ofdreiwung nët esou liicht gefall, wa se anatomesch méi genee gesot hätte: “Meine Gebärmutter gehört mir!” Hei geet ët ëm en Organ, wat alle Fraen eegen ass, wat aus enger Fra eng Mamm mécht, wa si e Kand “gebiert”.

Fir d`éischt gouf ët eng “Indikatiounléisung”. De Noweis vu sexueller Gewalt oder d`Erwaarde vun engem behënnerte Kand hunn eng Ofdreiwung erméiglecht. Duerno gouf d`”Fristeléisung” legaliséiert, well ët jo och nach aner Ursaache ginn, z.B. dee Lastiksbegrëff vu “sozialer Indikatioun”, fir e Kand viru senger Gebuert ëmzebréngen. (Lo stinn erëm muncherengem d`Hoer zu Bierg, wann en “ëmbrénge” liest. Ma wann ech eppes dout maache, wat lieft, da maachen ech futte (Déier) oder ech bréngen ëm (Mënsch).) Ech verstinn, datt eng Fra an enger schwiereger Situatioun ass, wa se e Kand erwaart no enger Vergewaltegung oder mat enger geféierlecher Krankheet. Mee dat wat an hier eruwiisst ass e Mënsch. Dat wat een ofdreift ass beileiwe nët nuren eng Knupp Fleesch (http://tinyurl.com/obt3l2x) All Kand, dat op d`Welt kënnt, huet seng eege Wäerter! Am 15. Jorhonnert huet en dichtege Notär zu Florenz sech u senger Sklavin vergraff. Si gouf schwanger, huet e Jong op d`Welt gesat an hien Leonardo genannt. Hie gouf dee wuel genialste Wëssenschaftler, deen d`Welt kennt: de Leoardo da Vinci. Am Joer 1174 huet zu Bonn eng Fra, déi d`Schwindsucht hat, e Bouf op d`Welt gesat, obwuel d`Dokteren hier un d`Häerz geluecht hate, keng Kanner ze kréien. De Bouf ass weltbekannt ënnert dem Numm Ludwig van Beethoven. Nët jiddereen gëtt e Genie, mee dat huet näischt domat ze dinn, ob d`Kand gewollt oder nët gewollt ass. All Kand soll seng Chance kréien.

Erstaunlech ass ët, datt d`Diskussioun iwwer Folge vun enger Ofdreiwung bei der Fra an deene seelenste Fäll thematiséiert gëtt. Et duerf een nët iwwersinn, datt vill Fraen hiert Liewe laang un de séilesche Folgen ze leiden hunn; an dat wäert an Zoukonft nach méi dacks de Fall sinn, well déi obligatoresch Berodung jo soll ofgeschaf ginn.

Wann déi aktuell Fuerderunge vun de Protagoniste vun der Ofdreiwung gestëmmt sinn, wäerten se sech gläich erëm un den Dësch setze fir dee nächste Schrëtt virzebereeden. Dir gleeft dat nët? Abee, zwee Dokteren, deen een aus Australien an deen aneren aus Kanada hu viru kuerzem fir eng “postnatal abortion”, also eng Ofdreiwung NO der Gebuert plädéiert, mam Argument, dës Kanner hätte nach keng Perséinlechkeet. Wat eng pervers Gesellschaft, déi deen, deen eng jonk Kaz an engem Ämer Waasser ersäift, an de Schlagzeile vun de Medien uprangert a virun de Riichter schleeft an de Muerd un ongebuerene Kanner legaliséiert!

Wéi schéi wier ët, wa mer eis un dëser Usiicht kéinten orientéieren: Den Dout stellt ee fest, wann d`Häerz ophält mat schloen. Firwat stellt een d`Liewe nët fest, wann d`Häerz ufänkt mat schloen.


Deel 2 (Famill a Bestiednes) an Deel 3 (Euthanasie) kommen no.

Gréng Politik

„Green is beautyful“, sou ass e Slogan vun der grénger Bewegung. Wann een an den Ufanksjoeren vun dëser Bewegung gemengt huet erkennen ze kënnen, datt ët sech ëm e gutt Zesummespill vu Mënsch a Natur géing handelen, sou muss een haut feststellen, datt ët ëmmer méi ëm en Duerchsetze vun enger Ideologie geet, bei deeër de Mënsch ëmmer méi d`Roll vum Béisen zougeschoustert kritt. Mat der Deklaratioun vun der “Klima-Erwäermung” koum dee groussen Duerchbroch: de Mënsch ass un allem Iwwel Schold duerch den CO2-Ausstouss. D`Kuelendioxid-Reduktioun gëtt ewéi en hellege Gral iwwert all Aktioune gehal an näischt huet méi eng grouss Prioritéit wéi d`Verréngerung vun dësem schicksalsträchte Gas, dee jo schon an der enormer Quantitéit vun 0,04% derbäi ass, dës Äerd a kiirzter Zäit onbewunnbar ze maachen. Fir dat ze verhënneren sinn all Affer gutt genuch: finanzieller an esou guer mënschlecher! Beispiller gefälleg?

Virun e puer Deeg huet déi däitsch Ëmweltministesch Barabara Hendricks um Klimagipfel zu New York deklaréiert, datt Däitschland keng Kuelekraaftwierker an Afrika méi géing subventionéieren. Wann d`Ursaach déi schlecht finanziell Situatioun vun Däitschland wier, da misst een eis Nopere jo bedaueren. Neen, d`Ursaach ass den CO2. Weltwäit stierwen all Joer geschate knapp 5 Millioune Leit well se aus Mangel un ugepassten Energiequellen hir Moolzechten op oppenem Feier zoubereede mussen. Vläicht gesäit d`Madame Hendricks ët als e positive Beitrag zu der Iwwerbevëlkerung vun der Äerd. Ët ass op jidder Fall e Beweis, wéi asozial gréng Gedankegäng kënne sinn. Ët weist ganz kloer, datt ët hir nët ëm d`Wuel vun de Mënschen an Afrika geet, mee ëm her Anti-CO2-Ideologie. An d`Ëmwelt gëtt domat och emol nach nët geschützt, well e neit Kuelekraaftwierk mat moderne Filteren verbrennt d`Kuel wesentlech méi propper wéi all déi kleng Feieren, bei deenen Kou- a Kaméilfläpp an nach aner Gedräcks verbrannt gëtt.

En anert Beispill gefälleg? E Bam muss geschützt ginn an all perséinlech Interessi mussen virum  “Interessi” vum Bam zeréckstoen.  Wien emol en Haus wollt bauen op eng Plaz wou schon e Bam steet, oder e Bam grad virun enger Garagenafahrt stoen hat, weess vu wat ech schwätzen. Wann der ower eng Vulleschredder, Pardon e Wandrad wëllt opstellen, da muss all Natur zeréck wäichen. Bei eisen däitsche Noperen ginn ëmmer méi gigantesch Wandrieder ...an de Bësch gesat. Duerfir mussen Hektare Bësch ëmgeluecht ginn an de Buedem mat Makadam  a Betong versigelt ginn. Dozou huet eng gréng Landes-Ëmweltministesch gemengt, si hätte souwisou schon zevill Bësch.

A wéi ass ët bei äis? Vum Biotope-Kadaster, dee muncherengem Bauer weist, datt hien säi Land vun elo un nët méi esou däerf beakeren, wéi dat schon zanter Generatioune geschitt ass, hu mer all matkritt. Hei méi e rezent Beispill. Eis Ëmweltministesch Carole Dieschburg huet eng Étude iwwer den Tanktourismus an Optrag ginn mam Zil, dësen Tanktourismus anzedämmen an esou d`CO2-Bilanz vu Lëtzebuerg ze verbesseren. Wa si dësen Tourismus kann ënnerbannen, da geléngt hier dat ganz sécher, mee mat wat fir Niewewierkungen? Fir dat erauszefanne brauch ee keng deier Étuden, mee mat e bësse gesonde Mënscheverstand fënnt een dat selwer eraus.

-        Well mer d`Auslänner nët kënnen drun hënneren, hei zu Lëtzebuerg ze tanken, muss dat iwwert de Präis geschéien; dat heescht mer mussen eis dem Präisniveau vun eisen Noperen upassen – am bäschten deem deiersten! Da verzichten se fräiwëlleg op en Trip iwwer d`Grenz no Lëtzebuerg.

-        D`Leit tanke well se Benzin brauchen, och d`Auslänner. Dat wat also hei manner getankt gëtt, gëtt bei eise Nopere méi getankt. Den CO2-Ausstouss bleift genee deen nämmlechten. (mee eis Statistike gi besser: manner CO2-Ausstouss zu Lëtzebuerg)

-        Déi hei nët méi tanken, kafen och nët méi an den Tank-Shopen an. Och do ginn dem Land ganz vill Suen laanscht d`Nues (bréngt awer besser Statistiken: manner Alkohol- an Tubakkonsum zu Lëtzebuerg)

-        Well op eise Grenzen manner getankt a verkaf gëtt, mussen eng Parti Tank-Shopen zou maachen an d`Personal entloossen.

-        Well de Benzin méi deier gëtt, geet d`Kaafkraaft vun de Lëtzebuerger erof.

Mee alles dat ass deene Gréngen egal, wa mer nuren dee béise Kuelendioxid domat bei eis am Land reduzéiert kréien. Wann dat geschitt, kann ech eiser blo-rout-GRÉNGER Regierung d`Nohaltegkeet bescheinegen: un deem wat eisem Staat duerch déi Moossnam un Einname verluere geet an nach zousätzlech kascht (méi Aarbechstloser), wäerte mär an eis Kanner nach laang knaen.