Europäesche Journaliste-Filz

“D`Kanner an d`Gecke soen d`Wourecht” heescht ët. Dofir haten d`Grofen an d`Kinniken fréier den “Hofnarr”. Haut gëtt ët duerfir d`Kabarettisten.

Wann Der Iech ukuckt, wat déi zwee vun der “Anstalt” um ZDF den 29. Abrëll opgedëscht hunn, da bleift Iech d`Laachen am Hals stiechen. Aus Qualitéitsjournalismus  ass e korrupte Journalismus entstan, deen op eeklegst Aart a Weis mat enger grad esou korrupter Politikerkast zesumme mauschelt. Ass ët wierklech dat Europa, dat Der wëllt? De 25. Mee huet jiddereen d`Geleeënheet ze weisen, wat hien vun esou engem Europa hält!

https://www.youtube.com/watch?v=5_c2-Yg5spU

Glawen oder "Neien Atheismus"? (2. Deel)

2.       Den Afloss vun dem Chrëschtleche Glawen op d`Gesellschaft

De Chrëschtleche Glawen huet sech virun allem am griichesch-réimesche Kulturberäich ausgebreet. Mer schwätzen haut gäre vun der griichescher Staatsform als déi éischt Demokratie. Dobäi iwwersi mer ower ganz gär, datt eng Gesellschaft wéi se virun 2000 Joer existéiert huet, haut op gréisst Widderstänn géing stoussen.

Demokratesch huet deemools nure Fräiheet fir wéineg Mënsche bedeit. Zu Athen wore 50% vun den Awunner Sklaven, zu Roum nach ongeféier 25%. An dem Gesetz patrias potestas ass déi onbeschränkte Bestëmmungsgewalt vum Famillienoberhaupt, dem pater familias fest geluecht. Hien hat d`Recht de Mann fir seng Meedercher  erauszesichen, konnt iwwer d`Iwwerliewe vun neigebuerene Kanner bestëmmen an d`Doudesstrof iwwer seng Fra, wa se friem gaang ass, ausspriechen. Hien hat praktesch Gewalt iwwert seng ganz Famill, Fra, Kanner, Enkelkanner. Hie konnt sech vu senger Fra scheeden, wa si ouni Schleier an d`Ëffentlechkeet gaang ass. Seng Fra ower hat kee Scheedungsrecht; jo si hat nët emol d`Recht, sech an der Ëffentlechkeet ze äusseren; wa si hir Meenung zu eppes wollt ausdrécken, huet si hirem Mann dës matgedeelt, deen da fir si geschwat huet. Ofdreiwung a Kannermuerd wore – besonnesch bei Meedercher – gängeg Praktiken, a wie seng Kanner nët wollt ëmbréngen huet se einfach ausgesat oder als Sklave verkaf. All dat huet derzou gefouert, datt besonnesch wéineg Meedercher opgewuess sinn, déi dann och nach am Géigesaz zu de Jongen normalerweis nët liesen a schreiwe geléiert hunn. D`Prostitutioun gouf zu enger ëffentlecher Ugeleeënheet an d`Homosexualtéit huet sech  ëmmer méi  ausgebreet.

An esou enger Welt hunn d`Chrëschten gewierkt. Hir Botschaft wor nët d`Priedegt, mee hiert Liewen. De Mann huet sech mat där Fra bestuet, déi och hien gären hat. Si hunn am géigesäitege Respekt zesummegelieft an hir Kanner als e Geschenk Gottes gläichwäerteg erzunn. Scheedungsrecht wor duerch d`Hälleg Schrëft festgeluecht an huet kee vu béiden bevirdeelegt. Si hu Gläichberechtegung gelieft schons laang éier dat Wuert geschafe gouf. Si hate Respekt virun der Obregkeet a Baarmhäerzegkeet fir déi Mannerbemëttelt, wat am griichesch-réimesche Kulturraum nët d`Gewunnecht wor. Nobäi dräi Jorhonnerte laang goufe si verfollegt wéinst hirem Glawen a well si de Keeser nët als Gott ubiede wollten.

Wéi am Joer 313 de Keeser Konstantin gleeweg ginn ass an hien de chrëschtleche Glawen zur Staatsrelioun  erhuewen huet, huet fir d`Kierch en neien Zäitalter ugefaang: aus der Gemeinschaft vun alle Gleewegen ass eng Institutioun entstan.  Dat wor gewëss nët ëmmer vu Virdeel, mee huet ët ower erméiglecht, elo wou d`Chrëschten  och méi offen handele konnten, munnech positiv Ännerung an der Gesellschaft ze provozéieren. Sou ka behaapt ginn, datt den Augustinus vun Hippo (354-430) mat senge Wierker nët nuren de Glawenswee vu muncherengem geprägt huet, mee och déi philosophesch Denkrichtung am “Abendland” virginn huet. Seng Betounung op de Mënsch als Individuum steet am krasse Géigesaatz zur antiker Denkweis, wou de Mënsch nure säi Wäert als Deel vun der Gesellschaft hat (wat dozou gefouert huet, datt deen Eenzelnen nët vill Wäert hat).

Hei elo den Afloss vum chrëschtleche Glawen a verschidde Beräicher:

·         Gesetzer

Bis an dat 6. Jorhonnert eran wor dat réimescht Recht a Kraaft, eng konfus Mass vun ënnerschiddleche Bestëmmunge, Gesetzer, Uerteeler an aner Virschrëften. Ënnert der Autoritéit vum Byzantinesche Keeser Justinian I gouf de Corpus Iuris Civilis an d`Liewe geruff. Seng Basis waren, no den Aussoen vun den Autoren, d`gëttlech Geboter, déi d`Chrëschten an d`Judden ënnert dem Numm “10 Gebote” kennen. De Karel de Groussen huet 802 dee nämmlechte Schratt gemaach mat sengen Kapitularen, déi hien esou beschriwwen huet: Jiddereen soll ganz am Aklang mat Gottes Geboter liewen.

Déi zwee grouss Wierker stinn do als Grondlag vun allen ziville Gesetzgebungen a Westeuropa (Ausnam Britesch Gesetzer). De Bezuch op Gott steet a ville Lännerverfassungen an an der amerikanescher Onofhängegkeetserklärung dran.

·         Schoul

An der griichesch-réimescher Welt gouf ët wéineg Schoulen. Si ware fir d`Jongen vun de fräie Bierger. Sklavekanner a Meedercher woren nët zougelooss. Wéi d`Kierch institutionaliséiert gouf, huet dat sech geännert. Op ville Plaze si Kléischter gegrënnt ginn. Bal all Klouschter hat seng Schreifstuff (Scriptorium); hei goufen d`Bibel an och aner Bicher ofgeschriwwen. Sou si mat der Zäit iwwerall Bibliothéiken entstanen. Doduerch sinn dann och Schoulen an de Kléischter derbäi komm. Munch eng vun deene Schoulen huet sech spéider zu enger bedeitender Universitéit entwéckelt, déi haut nach uewen op der Lëscht vun deene prestigiéiste Unien vun der Welt steet. Schoulen nuren an de Kléischter goung ower nët duer. Duerfir huet de Karel de Groussen 797 Uerder ginn, datt an all Uertschaft de Priister soll Schoul halen, an datt all Kand fir näischt an déi Schoul kéint léiere kommen. Dat wor d`Gebuertsstonn vun eiser Grond- oder Primärschoul.

An deene meeschten héiere Schoule gouf – am Ufank nuere vun Theologen, well si eleng haten déi néideg Ausbildung – an 2 Sproochen geléiert: d`Lokalsprooch a Latäin, dat domat zur Austauschsprooch ënnert de gebilte Leit an Europa gouf. Bal iwwerall gouf en dueblen Zyklus ugebueden: den “Trivium” (Grammatik, Rhetorik an Dialektik, also Ausbildung a Liese, Schreiwen an Denken) an de “Quadrivium” (Arithmetik, Geometrie, Astronomie a Musik). Dat waren alles konfessionell Héichschoulen. Déi éischt fräi Héichschoul, also och fir Nët-Klouschter-Schüler gouf 1559 vum Reformator Jean Calvin zu Genf gegrënnt. Hei gouf nieft Wëssenschaft och klassesch an theologesch Humanistik geléiert.

Déi éischt héier Schoul zu Lëtzebuerg gouf 1603 vun de Jesuite gegrënnt. 

·         Sozial Institutiounen

Ënnert de Réimer wor ët nach normal, engem Kranken nët ze hëllefen. Hëllef wor en Zeeche vu Schwächt. Et wor du schons revolutionär, wéi d`Chrëschte sech – ugedriwwen duerch de Gedanke vun der Nächsteléift – ëm déi Krank gekëmmert hunn. Dat gouf nët ëmmer positiv gesinn: sou gouf de Benignus vun Dijon ermuert, well hien handikapéiert Kanner versuergt huet. Wuel goufen ët bei de Griichen an de Réimer Plaze, wou Kranker behandelt goufen (Aesculapia an Valetudinaria), mee si wore wuel nure fir déi ganz Räich an och fir verletzten Zaldote reservéiert.

Um 1. Konzil vun Nicaea ass all Bëschof opgefuerdert ginn an hire Stiet Hospizen opzemaachen. An hinnen, de sougenannten Xenodochia, sollen nët nuren déi Krank gefleegt ginn, mee och déi Aarm opgeholl ginn. 369 gouf den Ufank gemeet mat engem grousse Komplex zu Caesarea a Kappadokien. Hei huet de Basilius nët nuren en Hospiz fir Kranker an Aarmer gebaut, mee och nach Haiser fir Dokteren a Fleegepersonal,  Atelieren a Handwierkerschoulen. Hei gouf nët nure gesond gefleegt, mee och nach op e bessert Liewen dobausse virbereet. Ëmmer méi Spideeler goufe gebaut an an der Mëtt vum 16. Jorhonnert goufen ët eleng 37000 Benediktinerkléischter, an deenen déi Krank versuergt goufen! Onnëtz ze betounen, datt all déi Aarbecht, déi an deene verschiddenen Hospizen a Spideeler geleescht gouf, op fräiwëlleger Basis vu Chrëschten ausgefouert gouf. Nach bis spéit an d`20. Jorhonnert eran gouf en Haaptundeel vun der Aarbecht an de lëtzebuerger Spideeler a Kliniken vun Uerdensschwesteren geleescht.

De Fransous Philippe Pinel, e fréieren Theologiestudent, huet 1793 als éischten an Europa Therapie ouni Zwangsmoossnam fir Geeschtegkranker agefouert. Hie huet mat senger chrëschtlecher Grondastellung Weeër bereet fir d`Entwecklung vun der moderner Psychiatrie.

Nieft hirem  Asaz a festen Instituter hunn d`Chrëschten ower och Pionéierleeschtung um Feld vollbruecht. Sou gouf déi jonk Florence Nightingale duerch d`Aarbecht vum Lutheraner Theodor Fiedner ganz staark beandrockt. De Fiedner hat en Diakonissinnen Uerden gegrënnt, dee sech op d`Ausbildung vun Infirmièren spezialiséiert hat. D`Nightingale gouf bekannt duerch hiren Asaatz am Krim-Krich 1854, wou si verwonnten Zaldoten gefleegt, awer och encouragéiert a getréischt huet a fir si Bréiwer geschriwwen huet. Aus dem Krich erëm doheem huet si zu London eng Schoul fir Infirmièren opgemeet. Si war mat hirem Wësse ganz dacks de studéierte Medeziner viraus an huet sech nët gescheit, e Liewen als räich Lady an der englescher High Society ofzeleene fir a chrëschtlecher Nächsteléift deene Bedürftegsten zur Säit ze stoen.

En anere chrëschtleche Pionéier op deem Gebitt ass den Henri Dunand. 1859 wor hien Zeie vu schreckleche Verletzungen an der Schluecht vu Solferino. Hien wollt e Wee fannen fir esou Verletzten ze hëllefen. En huet nët noginn a sengen Ustrengungen a 5 Joer méi spéit huet hien mat Delegéierten aus 16 Länner d`Rout Kräiz gegrënnt. Säi Glawen huet hie bewegt,  d`Kräiz, Symbol vum Leiden a vun der Erléisung, zum Symbol vu sengem Wierk ze maachen.

(Gëtt weidergefouert)

Glawen oder „Neien Atheismus“? (1. Deel)

Aféierung

Et ass nët z`iwwersinn, datt an deene leschte Joren d`Zuel vun de Leit, déi hire Glawen nach praktizéieren, ëmmer méi kleng gëtt. An engem demokratesche Stat läit deen Entscheet a jidderengem senger eegener Verantwortung a jiddereen huet d`Fräiheet nët ze gleewen oder dat ze gleewen, wat hie fir richteg fënnt. Zum richtege Versteesdemech vun Demokratie gehéiert och Toleranz géintiwwer deem anescht Gleewegen. A munche Medien a Kommentaren kommen d`Chrëschten – vun deene wëlle mer an dësem Artikel schwätzen – ganz schlecht ewech.  Et ass un der Zäit, fir déi Diskussioun emol eng Kéier fair an ouni falsch Emotiounen ze féieren. 

An engem éischte Kapitel wëlle mer eis mat der aktueller Diskussioun, déi jo bis elo zimlech eesäiteg zu Ongonschte vu gleewege Chrëschte gefouert gouf, beschäftegen. Am zweeten Deel gi mer dann op den Afloss vum Chrëschtentum op eis Gesellschaft an, fir dann ofschléissend eis Gedanken ze maachen iwwert eng Gesellschaft ouni chrëschtleche Glawen.

1.       D`Glawensdiskussioun an eiser postmoderner Gesellschaft

Fir d`éischt ass ët wichteg, datt een sech iwwer d`Begrëffer eens ass, déi an deeër Diskussioun ëmmer erëm falen. Hei zu Lëtzebuerg ginn d`Begrëffer Gleeweg, Chrëschten a Kierch ëmmer erëm an een Dëppe gehäit, ouni ze berücksichtegen, datt ët Chrëschte vun ënnerschiddlecher Denominatioun  gëtt: Katholiken, Anglikaner, Orthodoxer an déi grouss Palette vun de Protestanten. Dat duerf an der Diskussioun nët iwwersi ginn, och wann d`Zuel vun de Katholiken an eisem Land mindestens um Pabeier wesentlech méi grouss ass, wéi déi vun deenen anere Chrëschten. Och de Begrëff “Kierch” steet fir ënnerschiddlech Begrëffer. Niewent dem Gebai, an deem déi Gleeweg sech fir d`Gebied treffen, gëtt “Kierch” no der Bibel haaptsächlech benotzt fir d`Gesamtheet vun de Gleewegen. De Volleksmond mengt mat Kierch ower ganz dacks d`Organisation oder Institutioun. 

Fir géint d`Kierch resp. déi Gleeweg ze wiederen gräifen hier Kritiker haaptsächlech op zwee Instrumenter zeréck:

·         D`Stigmatiséirung mat Begrëffer, déi generell negativ behaft sinn ewéi: (erz)konservativ, fundamentalistesch, riets extrem, réckstänneg, wëssenschaftsfeindlech, intellektuell beschränkt asw.

An enger Gesellschaft, déi ëmmer méi lénks-liberal gëtt, gëtt och deen ëmmer méi riets (konservativ, fundamentalistesch), dee seng Positioun bäibehält. Wat déi aktuell Entwécklung vun de Wäerter ubelaangt, sou wäerte mer am 3. Kapitel nach méi an den Detail goen.

Ech wëll hei ower op een Aspekt agoen, nämlech deen vun der intellektueller Beschränktheet.  Opdriww kruten d`Protagoniste vun dësem Argument virun allem vum Britt Richard Dawkins, Professer an Zoologie, theoretescher Biologie an Evolutiounsbiologie op der Universitéit vun Oxford. Seng Bicher “The God Delusion” (Der Gotteswahn) an “The Greatest Show on Earth: The Evidence of Evolution” (Die Schöpfungslüge: Warum Darwin Recht hätte) hunn hien zum bekannteste Vertrieder vum “Neien Atheismus” gemeet. Wann esou renomméiert Männer wéi de Dawkins a säi nët manner renoméierte Kolleg Stephen Hawking, briteschen theoretesche Physiker an Astrophysiker, déi Gleeweg zu Idioten oder Wahnsinnegen ofstempelt, da muss dat jo bal richteg sinn. Dobäi gëtt gären iwwersinn, datt parallel zu hinnen hiere Kolleg John Lennox, emeritéierte Mathematiksprofesser  an der nämmlechter Universitéit vun Oxford an ëffentlechen Debatten dem Dawkins seng These widderluecht huet. Seng Bicher “God`s Undertaker; Has Science Buried God?” (Hat die Wissenschaft Gott begraben?) an “God and Stephen Hawking: Whose Design is ist anyway?” (Stephen Hawking, das Universum und Gott) loossen dem Dawkins an dem Hawking hir Argumenter op ganz wackelege Féiss stoen.

Intressant ass ët, e Bléck op eng medial vill beuechte Campagne  vum Dawkins ze geheien. Am Joer 2008 huet hien e Bus op den Wee geschéckt fir seng Usiicht ënner d`Leit ze bréngen. Mam Slogan: “There`s probably no God” huet de Bus an alle wichtege Stied vun der britescher Insel Halt gemeet, eng Aktioun, déi duerno och nach an enger Partie anere Länner duerchgefouert gouf. An deene 5 Wierder “Et gëtt wahrscheinlech kee Gott” féiert ee Wuert déi ganz Campagne “ad absurdum”: wahrscheinlech. Doduerch gëtt déi ganz Ausso relativéiert. Datt dat Wuert do steet kann nuren zwee Grënn hunn: entweder de Dawkins ass selwer guer nët esou sécher, datt seng Behaaptung stëmmt oder hie ka seng Behaaptung nët beweisen; vläicht ass och béides de Fall! Wann dat ower de Fall ass, da ginn dem Dawkins seng Theorien zu engem ... Glawenssaatz! Hie weist, datt ët keng Weltanschauung gëtt ouni Glawen. Ech gleewen un d`Existenz vu Gott oder ech gleewen un d`Nëtexistenz vu Gott, oder ower ët ass mer egal op Gott existéiert an ech gleewen, datt dat keng Folgen huet. Kee vun deenen dräi ka seng Usiicht beweisen.

Hei stinn zwéin exzellent Wëssenschaftler sech géintiwwer; deen een gleeft un Existenz vu Gott, deen anere gleeft un d`Nëtexistenz vu Gott ... a si beweisen domat, datt Glawen a Wëssenschaft sech nët ausschléissen. Am nächste Kapitel wäerte mer nach Bekanntschaft mat muenchem gleewege Wëssenschaftler maachen.

·         En zweet Argument géint de Glawen ass d`Geschicht vun der Institutioun Kierch, déi munch bluddeg Spueren hannerlooss huet. Et muss hei ganz offe gesot ginn, datt déi Verbriechen, déi am Numm vun der Kierch begaange gi sinn, sief en ët d`Kräizzich, d`Inquisitioun, d`Hexeprozesser nët z`entschëllege sinn. Um Ursprong vun all deenen Aktioune stounge Mënschen, déi sech wuel Chrëschte genannt hunn, mee Meile wäit vun deem ewech waren, wéi een als Chrëscht soll handelen. Senge Jénger huet Jesus zwee Haaptgeboter mat op de Wee ginn: Du solls Gott gären hunn, an du solls däi Nächsten esou gären hunn wéi dech selwer (Markusevangelium 12,30-31). Ech kann d`Institutioun Kierch veruerteele fir dat wat se gemeet huet, ech kann ower déi grouss Mass vu reell gleewege Chrëschten, d`Kierch am Sënn vu Jesus, nët an dës Verantwortung drängen. Dat ass déi eng Säit vun der Mënz.

Elo déi aner Säit. Rational schlussfolgernd Postmodernisten schléissen doraus, datt Glawe schlecht an also Atheismus gudd ass. Mat hiren Argumenter schéisse si sech selwer an de Knéi! Am vergaangene Jorhonnert sinn mindestens 100 Millioune Mënschen um Altor vum Atheismus geaffert ginn. Lenin , Stalin a Konsorten, Mao Zedong, Pol Pot an d`Rout Khmer, Ho Chi Minh, Nicolae Ceausescu an nach vill anerer hunn am Numm vun engem kommunistesch geprägten Atheismus gehandelt a gemord. An Nordkorea sinn a ginn nach weider Massenhiriichtunge vun der atheistescher Kim-Dynastie duerchgefouert. Wien d`Chrëschtentum ofleent wéinst senger bluddeger Vergaangenheet, muss aus deene nämlechte Grënn och den Atheismus ofleenen, wann e nach glafwierdeg wëllt sinn.

(Gëtt weidergefouert)

 

Firwat kee federalt Europa

Vu ville Säite gëtt de Ruff no engem federalen Europa nom Virbild vun den USA ëmmer méi kräfteg. Eis EU-Kommissärin huet sech dat als ee vun hiren Haaptziler an hier Agenda geschriwwen. D`Fro déi all eeschte Politiker stellen muss ass déi, op esou en Europa iwwerhaapt erstriewenswäert ass. E Bléck zeréck op déi rezent Geschicht vun Europa kann do vu grousser Hëllef sinn.

1952 ass ënnert dem Impuls vum Robert Schumann an dem Jean Monnet d`Montanunioun gegrënnt ginn. Wéi den Trauma vum 2. Weltkrich iwwerwonne wor hunn déi zwee grouss Staatsmänner mat hirer Initiativ den Handel tëschent 6 Länner rëm ugekuerbelt a gläichzäiteg d`Hand zur Verbridderung gereecht. Zu deem Zäitpunkt goufen ët an Europa 34 souverän Staten tëschent dem Atlantik an dem Ural. Déi groussaarteg Iddi vun enger Wiertschaftsunioun huet sech weider entwéckelt an ass iwwer d`EWG an d`EG, d`Europäesch Gemeinschaft iwwer gaang. Zu deene 6 Grënnerstate sinn anerer derbäi komm, d`Wierkungsfeld vun der EG huet sech erweidert an huet munch positiven Afloss bruecht, woubäi een och muss feststellen, datt nett alles grued gelaf ass, wéi z.B. dat iwwerdriwwent Amëschen vun der Gemeinschaft an d`Landwirtschaft.

Et duerf een allerdéngs nët iwwersinn, datt parallel zu der Bestriewung, Staten zu enger Gemeinschaft zesummen ze feieren, op ville Plazen an Europa Mënschegruppen hier Autonomie ugestrieft hunn. Et waren dat ëmmer Gruppe vu Mënschen, déi duerch eng gemeinsam Kultur, eng gemeinsam Sprooch an eng gemeinsam Geschicht sech zoueneen gehéireg gespuert hunn. Malta huet seng Onofhängkeet vu Groussbritannien 1964 krut. De Fall vum Kommunismus a mat him den Zerfall vun Sowjetunioun woren dunn dee groussen “Déclic”. A kierzester Zäit sinn d`baltesch Staten Estland, Lettland a Litauen, donieft dann och Wäissrussland, d`Ukrain a Moldawien entstan, respektiv nei entstan. Kuerz duerno ass Jugoslawien zerfall an huet an engem Prozess, deen nach unhält, Slowenien, Kroatien, Bosnien, Serbien (resp. Rescht-Jugoslawien), de Montenegro, Mazedonien an de Kosovo op den europäesche Plang bruecht. Wat nët zesummen eru gewuess wor, konnt och net zesummen halen. Dat léiere mer och un der Geschicht vun der Tschechoslowakei, wou haut zwee eegestänneg Staten, Tschechien an d`Slowakei niewenteneen existéieren.

Dës Entwécklung ass beileiwe nach nët eriwwer. D`Baskeland a Nordirland stinn ëmmer erëm an de Schlagzeilen wann d`Separatisten aktiv ginn. A Schottland fënnt am September an a Katalonien am November jeeweils e Referendum statt fir iwwert d`Oftrennung vun deene jeeweilege Gebidder vun de Stammstaten Groussbritannien a Spuenien ofzestëmmen. A Venetien ass elo grad iwwer Internet eng inoffiziell Ofstëmmung gelaf fir sech vun Italien ofzesplécken a Sizilien plangt am Hierscht e Marsch fir d`Onofhängegkeet. Triest, dat 1954 zu Italien geschloe ginn ass, strieft och erëm d`Eegestännegkeet un. An ët ass sécher keng bëlleg Spekulatioun, wann een sech d`Fro stellt, wéini Südtirol, Sardinien an d`Lombardei, respektiv Wales oder och Korsika nët méi wëllen eng Regioun, mee e Stat sinn.

A grad elo mengen eis héich EU-Politiker festzestellen, datt dee richtege Moment komm ass fir all déi Staten zu enger Federatioun zesummen ze féieren. An aller Objektivitéit muss ee feststellen, datt eng Volleksgemeinschaft, déi géint de Wëlle vun de Leit entstan ass, op kuerz oder laang erëm auserneen dreift, well d`Zesummeliewen an engem gemeinsame Land nët ouni Reiwereie vollzu ka ginn. Jiddereen vun eis lieft mat senge Noperen a senger Strooss am Fridden, esou laang jiddereen säi Gaart, seng Terrasse a säi Grilleck huet. Wa mer d`Maueren an d`Hecken tëschent de Gäert ewech huelen an alles vergemeinsamen, dann huet de Fridde geschwënn ausgedingt.

Duerfir wieren d`Politiker gutt beroden (géife beweisen, datt een och aus der Geschicht ka léieren), wa se de Gedanke vum Federalstat ganz schnell géinge fale loossen an dofir géinge suergen, datt jiddereen am gudden Afersteestemech mat senge Nopere liewe kann. Datt do nach genuch Aarbecht ass gesi mer ouni eis unzestrengen, wa mer bis bei eis Belsch Nopere kucken gin.

Homophobie oder Heterophobie?

Et vergeet kaum een Dag, op deem nët iwwert Medien d ‘Diskussioun iwwer Homosexualitéit Schlagzeile mécht. Déi läscht Noriichten aus Afrika weisen eis, datt déi Diskussioun och an anere Kulturkreeser gefouert gëtt. 

Ech perséinlech sinn der Meenung, datt jidder Mënsch d ‘Fräiheet huet zu senger sexueller Ausriichtung. Dat sinn d ‘Regelen vun der Demokratie an un déi hu mir eis all ze halen, op mer déi sexuell Ausriichtung fir gutt fannen oder nët.

Déi Demokratie gëtt mir ower och d ‘Fräiheet meng Meenung iwwer déi Ausriichtung ze soen, op dat mengem Géintiwwer gefält oder nët! Sech géigesäiteg d ’Recht op fräi Meenungsäusserung zouzegestoen nennt een Toleranz.

Jidder Mënsch huet d ’Recht, eng aner Liewensform, déi him nët gefält, als schlecht unzegesinn. Dat gëllt, op ech en Hetero oder en Homo sinn. Déi Meenung duerf ech offen an all Diskussiounsronn vu mer ginn, ouni datt ech duer wéinst eng Phobie zougeuerdent kréien.

Leider erlieft een ët a leschter Zäit ëmmer méi dacks, datt een als Heterosexuellen zu engem “Homophobist” gemaach gëtt, wann ee fest zu senger Iwwerzeegung steet a versicht mat Argumenter sech ze rechtfertegen. Et ass een en Erzkonservativen, e Fundamentalist, en Onbeléierbaren, a munnech Mol souguer e Faschist, wann een un der traditioneller Famill (Mann a Fra mat Kanner) fest hält a sech géint de Status vu Famill an d ’Adoptiounsrecht vun Homo-Kopplen ausschwätzt. Eng franséisch Ministesch huet gemengt, déi “archaesch” Form vu Famill wier iwwerlieft. Dat ass hier Meenung. Meng Meenung ass, datt déi Form vun Zesummeliewen wéi se besteet zanter datt ët Mënsche gëtt –  archaesch kënnt aus dem griicheschen a bedeit: vun Ufank unn – déi bescht Form ass. Si eleng huet d ’Iwwerliewen an de Wuesstem vun der Mënschheet garantéiert, si stoung um Ufank vun alle Forme vu sozialem Zesummeliewen, vun der Groussfamill iwwer d ’Duerfgemeinschaft bis zum Staat.

Jiddereen huet d ’Recht, dës Astellung nët mat mir ze deelen. Jiddereen huet och d ’Recht dat an der Ëffentlechkeet ze soen, sou wéi ech et maachen. Ech kann ower nët mat averstane sinn mat der Aggressivitéit an dem Exklusivitéitsusproch, mat deem Protagoniste vun enger neier Homogesellschaft un d ’Wierk ginn. D ‘Neutralitéit vun eise Medien huet scho ganz staark ënnert dem Afloss vun enger Homolobby gelidden an d ‘Stëmmung géint déi, déi sech duergéint wieren, gëtt ëmmer méi aggressiv.

Ech wëll hei virun enger fataler Feelentwécklung warnen. Nach ass ët nët ze spéit fir eng sachlech Diskussioun ze féieren, déi nët déi perséinlech Interessien a Wënsch an de Mëttelpunkt stellt, mee d ‘ Wuel vun der ganzer Gesellschaft, den Erwuessenen, onofhängeg vun hirer sexueller Orientéierung, an de Kanner.

A grad bei de Kanner gëlt ët mat Vernunft an ouni eesäiteger Indoktrinatioun virzegoen.  Hei sollt en Unterechtspobeier aus Däitschland eis ze denke ginn. D ‘Gewerkschaft Erziehung und Wissenschaft (no eegenen Aussoen:  Die GEW ist ... die mit Abstand größte gewerkschaftliche Interessenvertretung für alle Beschäftigten im Bildungswesen.) huet am Zesummenhang mat der Homodiskussioun a Baden-Württemberg  Unterrechtsvirlagen erausbruecht zum Thema “Lesbische und schwule Lebensweisen - ein Thema für die Schule “. Op d ’mannst am Titel si se éierlech: sexuell Erzéiung begräift nure méi d ‘Homosexualitéit.

Aus der ganzer “Publikation für Lehrer/Innen” hei just een Auszuch mat engem Froekatalog fir eng 7. Klass.

Der heterosexuelle Fragebogen

1 Woher glaubst du, kommt deine Heterosexualität?

2 Wann und warum hast du dich entschlossen, heterosexuell zu sein?

3 Ist es möglich, dass deine Heterosexualität nur eine Phase ist und dass du diese Phase überwinden wirst?

4 Ist es möglich, dass deine Heterosexualität von einer neurotischen Angst vor Menschen des gleichen Geschlechtes kommt?

5 Wissen deine Eltern, dass du heterosexuell bist? Wissen es Deine Freundinnen und Freunde? Wie haben sie reagiert?

6 Eine ungleich starke Mehrheit der Kinderbelästiger ist heterosexuell. Kannst Du es verantworten, deine Kinder heterosexuellen Lehrer/innen auszusetzen?

7 Was machen Männer und Frauen denn eigentlich im Bett zusammen? Wie können sie wirklich wissen, wie sie sich gegenseitig befriedigen können, wo sie doch anatomisch so unterschiedlich sind?

8 Obwohl die Gesellschaft die Ehe so stark unterstützt, steigt die Scheidungsraten immer mehr. Warum gibt es so wenige langjährige, stabile Beziehungen unter Heterosexuellen?

9 Laut Statistik kommen Geschlechtskrankheiten bei Lesben am wenigsten vor. Ist es daher für Frauen wirklich sinnvoll, eine heterosexuelle Lebensweise zu führen und so das Risiko von Geschlechtskrankheiten und Schwangerschaft einzugehen?

10 In Anbetracht der Übervölkerung stellt sich folgende Frage: Wie könnte die Menschheit überleben, wenn alle heterosexuell wären?

11 Es scheint sehr wenige glückliche Heterosexuelle zu geben; aber es wurden Verfahren entwickelt, die es dir möglich machen könnten, dich zu ändern, falls du es wirklich willst. Hast du schon einmal in Betracht gezogen, eine Elektroschocktherapie zu machen?

12 Möchtest du, dass dein Kind heterosexuell ist, obwohl du die Probleme kennst, mit denen es konfrontiert würde?

Dat muss ee wierklech zwee Mol liese, fir sech bewosst ze ginn, wourëm ët hei wierklech geet: nët méi d’ Heterosexualitéit ass de Normalfall, mee d’ Homosexualitéit. Hei geet ët nët ëm Opklärung iwwer déi verschidde Forme vu Sexualitéit, mee ganz einfach iwwer d’ Ëmerzéiung zur Homosexualitéit. Hei gëtt eng geféierlech Heterophobie bei deene gepriedegt, déi am empfänglechsten dofir sinn.

Et sollt een dës Froen am Detail ënnersiche fir sech vun der perfider Indoktrinatioun ze iwwerzeegen.

Fro 1: Hei kritt dat 13-joer aalt Kand scho ganz subtil vermëttelt, datt seng Heterosexualitéit eng Folleg vun iergend engem Virgang/Erliefnes ass an a sech nët normal ass.

Fro 2: Wat soll e Kand vun 13 Joer duerop äntweren. Ech wéisst haut mat 68 Joer nach keng Äntwert drop, well ech ganz einfach esou op d ‘Welt komm sinn.

Fro 3: Hei gëtt gehandelt nom Motto: dat ass nët esou schlëmm, wann s de elo Hetero bass; dat wäert och erlaanscht goen a mär kënnen dir dobäi hëllefen.

Fro 4: Ofgesinn dovun, datt ee mat 13 Joer kaum eppes mat “neurotescher Angst” unzefänke weess, gëtt hei d ‘Richtung scho genee festgeluecht: Wien Hetero ass brauch Hëllef well hien e psychesche Problem huet.

Fro 5: Elo sollen also déi Kanner sech “outen” virun der Famill an de Frënn! Wa se näischt mam Ausdrock “neurotescher Angst” an der Fro 4 ufänke konnten, da wëssen se ët bestëmmt no hirem “Outing”!

Fro 6: Wann d ‘Homo’en 10% vun der Bevëlkerung ausmaachen, da wier ët nure normal, wa si och méi e geringe Prozentsaatz bei de Kannerbelästeger géingen ausmaachen. Wa mer ower op déi rezent Berichter zeréckkucken (Skandaler an der kathoulescher Kierch an an däitschen Internater), da muss ee ganz staark Zweiflen un där Behaaptung umellen. Et ass zousätzlech genee esou falsch eng allgemeng Panikmaacherei erop ze beschwieren, op Léierpersonal heterosexuell oder homosexuell ass.

Fro 7: Dovunner ofgesinn, datt an der ganzer Diskussioun de Begrëff “Léift” op d ‘Bett reduzéiert gëtt, ass et aarmséileg z ‘ënnerstellen, datt eng heterosexuell Koppel, déi sech gären huet (!), sech nët am Bett géinge verstoen. Och am Bett kann ee matenee schwätzen!

Fro 8: Datt vill Koppelen haut nët méi zesumme bleiwen, huet kaum eppes mat hirer sexueller Astellung ze dinn, wéi mat hiren ënnerschiddlechen Opfaassungen, nët nuren am Bett. Am Iwweregen halen och vill Homoen et nët bis un den Dout mateneen aus!

Fro 9: Firwat gëtt hei nure vu Lesben an nët vu Schwulen geschwat? D ‘Äntwert ass ganz einfach: déi Schwul hunn däitlech méi Geschlechtskrankheeten opzeweise wéi d ‘Heteroen. A firwat gëtt bei der heiter Fro nët iwwert den Aids geschwat? Dat ass dach wierklech kee Staatsgeheimnis méi, datt grad ënner Homoen den Aids e grousse Problem ass. Niewebäi bemierkt muss ee sech d ‘Fro stelle wéi e kranke Geescht hanner esou enger Fro stécht, wou Geschlechtskrankheete mat Schwangerschaft an engem Otemzug genannt ginn.

Fro 10: Géigefro: a wéi sollt eise Sozialsystem iwwerliewe, wéi sollt eis Gesellschaft iwwerliewe, wa se all homosexuell wieren?

Fro 11: Hei gëtt d ‘Kaaz aus dem Sak gelooss. Hetrosexualitéit ass eng Krankheet! Wann een ëffentlech behaapt, Homosexualitéit kéint ënner Ëmstänn geheelt ginn, dann ass een automatesch e reliéise Fundamentalist. Hei bidde Pädagogen (?) Kanner eng Heelung vun hierer Heterosexualitéit duerch Elektroschock un ... an erhiewen sech domat zu Fundamentaliste vun hirer Relioun: der Homorelioun.

Fro 12: Lo suerge mer also scho vir: wann se selwer bis Kanner kréien (wien erkläert hinnen da wéi se als Homo’en dat maache sollen?), da sollen se vu vir eran dofir suergen, datt d ‘Kanner sech zu Homo’en entwéckelen.

Ass dat wierklech déi Welt, op déi mer zougoe wëllen? Et gëtt Zäit, héich Zäit datt mer eis seriéis Gedanke maachen iwwer d ‘Zukunft vun eiser Gesellschaft, iwwert Erzéiung vun eise Kanner an iwwert e gesong Mateneeliewe vun alle Mënschen.